هو انا شكلي وحش
هو انا شكلي وحش
- مش انتي قولتي ان القهوه بتاعتهم حلوه؟
= اه ما انا ساعتها مكنتش بكلمك بأمانه
ضحك وبعدين قالي طيب اعزمك علي ايه؟
= انا بشرب نسكافيه دلوقتي..اطلب حاجه ليك
نادي الجارسون وطلب نسكافية زيي، مكنتش عارفه المفروض اقوله ايه..هو كدا ممكن يكون فاهمني غلط؟
فاهم اني بنت مش كويسه؟
- بالمناسبه انا اسمي غيث
- مقولتليش بقا اسمك ايه؟
= اسمي هدى
- اسمك جميل اوي
= هو انت فاهمني غلط؟
اصل ان بنت توقفك في الشارع وتسألك شكلها حلو ولا لأ وتقولك تعزمها علي قهوه اكيد هتتفهم غلط ف انت فهمتني غلط؟
- لا انتي مش شكل بنت مش محترمه..شكلك هبله
= اه عندك حق انا فعلا هبـ..ايه؟ لا انا مش هبله!
- عبيطه طيب؟
= اهو انت الي عبيط وستين عبيط..انت جاي تعكرلي مزاجي؟
- حد قالك تقوليلي اجي؟
= مكنتش اعرف انك مستفز!
- كويس اديكي عرفتي..
بتقرأي ايه؟
= ملكش دعوه..عمومًا انا اتأخرت ولازم امشي
- مش هشوفك تاني؟
= بكون موجودة هنا كل يوم
مشيت..اتبسطت انه جه مع اني معرفهوش ولا حتي هو كان يعرفني..ايه اللي يخلي واحد يغيب يوم من شغله علشان يقعد مع واحده هو ميعرفهاش؟
فضلت اروح الكافيه كل يوم زي عادتي بس مكنتش بلاقيه، كنت بحس اني مضايقه، مكنش بيوحشني بس مكنتش عايزه افضل لوحدي..
عدا 3 اسابيع مشوفتهوش فيهم وفقدت الامل انه يجي
قعدت وطلعت رواية وبدأت اقرأ..
سمعت صوت الكرسي بيتشد ف عرفت انه جه..
- صالحني
= اصالحك؟
- اه مانت بقالك كتير مبتجيش وبفضل قاعدة لوحدي ودا شئ يستدعي انك تصالحني
= ولو مصالحتكيش؟
- هنادي علي الجارسون واقوله انك بتطفل عليا وقاعد علي نفس الترابيزه من غير موافقتي ف هيقولك تقعد علي ترابيزه تانيه ولو موافقتش هيضطر يقولك تمشي
= طب مش تسأليني الاول مكنتش باجي ليه؟
- اممم..طيب..مكنتش بتيجي ليه؟
= كنت في تركيا
- تركيا؟
= اه سفريه تبع شغلي
- الله..ان شاء الله المره الجاية تاخدني معاك..انا قررت خلاص
= تيجي تعيشي حياتي بدالي؟ تيجي والله؟
- بتتريق؟
= اصل دا مش كلام ناس عاقلين يعني؟
- قصدك اني مجنونه؟
= انا مقولتش كدا
- اه بس اكيد قولت كدا في سرك
= سري وانا حر فيه
- لا سرك ميجيبش سيرتي علي لسانه،احسن والله ا..اا..اقطعه واخليك ماشي من غير سر كدا والناس تقول اللي من غير سر راح اللي من غير سر جه
= ما علينا..شكلك حلو النهاردة
