بيت الرقصة كامله

في أجازة من أجازات الجيش واحد معرفة قالي على نحتاية كدا أقلب فيها عيشي واعمل قرشين الشغلانة دي كانت في محافظة من المحافظات القريبة مني وكانت هتخلص في اربع ايام بالظبط خدت اتنين صحابي وروحنا ..
طبعا احنا محتاجين سكن لمدة الأربع ايام اللي هنقعدهم في البلد دي المهم يعني بعد لف وتدوير وبتاع لقينا بيت في آآآآخر البلد والإيجار بتاعه متهاود احنا دفعنا إيجار شهر ومع ذلك مكانش مبلغ كبير خالص ..

باب البيت كان باب خشب قديم تحس ان مفيش إيد خبطت عليه من أيام الحملة الفرنسية والبيت كله على بعضه متهالك وحالته تصعب على الكافر ..
دخلنا جوا حطينا حاجتنا طبعا مفيش نور شغلنا فلاش الموبايل العنكبوت معشش في كل مكان والبيت مترب وحالته تقرف الحيوانات احنا قلنا مش مشكلة يعني احنا مش هنعيش هنا طول العمر هما كام يوم نخلص الشغلانة ونرجع القاهرة ..
المهم أول ما دخلنا البيت لقينا قطة سودا جوا أنا مش عارف كانت عايشة هنا ازاي حطينالها أكل يعني على أساس رحماء بقى وكدا والقطة مش راضية تاكل وعمالة تبرقلنا في الضلمة وشكل أمها يرعب ..
قعدنا نسف على الحكاية دي خصوصا اننا كنا بناكل كبدة فقعدنا بقى نرمي إيفيهات من بتاعة أصل القطط مبتاكلش بعضها وبتاع ونضحك ونحلو ..
لحد كدا جميل أوي ..
صاحبي اللي جابلي الشغلانة دي كلمني في التليفون عشان يشوفنا وصلنا لفين ولقينا مكان نبات فيه وللا لأ 
قلتله اه احنا أجرنا البيت اللي في آخر البلد دا قالي أنهي بيت قولتله البيت القديم أوي دا اللي في آخر البلد وقعدت اوصفله البيت ..
قالي اوعى يكون قصدك على بيت الرقاصة قولتله معرفش بقى بيت رقاصة وللا مهندسة ديكور ..
قالي اوصفلي يا اسطا البيت كدا من برا ومن جوا ..
وصفتله البيت لقيته تقريبا كان بيلطم في التليفون وبيقولي هو بيت الرقاااااصة هي الدنيا يعني كانت ضاقت في وشك سايب البلد كلها ورايح تبيت في بيت الرقاصة ..
قولتله مالها يعني الرقاصة دي 
قالي اټقتلت في البيت